اجمل ما قدم من رباعيات الخيام

خرج ابن ادم من عدم قلت : ياه

رجع ابن ادم للعدم قلت : ياه

تراب بيحيا .. وحي بيصير تراب

الاصل هو الموت والا الحياة ؟

وعجبي !!!

*****

ضريح رخام فيه السعيد اندفن

وحفرة فيها الشريد من غير كفن

مرت عليهم .. قلت يا للعجب

لاتنين ريحتهم ليها نفس العفن

وعجبي !!!

*****

ياما صادفت صحاب وماصحبتهمش

وكاسات خمور وشراب ومشربتهش

اندم علي الفرص اللي انا سبتهم

ولا علي الفرص اللي ما سبتهمش

وعجبي !!!

*****

والكون ده كيف موجود منغير حدود ؟

وفيه عقارب ليه وتعابين ودود ؟

عالم مجرب فات وقال سلامات

ده ياما فيه سؤلات من غير ردود

وعجبي !!!

*****

انا شاب لكن عمري ولا الف عام

وحيد لكن بين ضلوعي زحام

خايف ولكن خوفي مني انا

اخرس ولكن قلبي مليان كلام

وعجبي !!!

*****

يا باب يا مقفول .. امتي الدخول ؟

صبرت ياما .. واللي يصبر ينول

دقيت سنين .. والرد يرجع لي : مين ؟

لو كنت عارف مين انا كنت اقول

وعجبي !!!

*****

احب اعيش ولو في الغابات

اصحي كما ولدتني امي وابات

طائر .. حيوان .. حشرة .. بشر بس اعيش

محلا الحياة .. حتي في هيئة نبات

وعجبي !!!

*****

سهير ليالي وياما لفيت وطفت

وف ليله راجع في الضلام قمت شفت

الخوف ... كأنه كلب سد الطريق

زكنت عاوز اقتله .. بس خفت

وعجبي !!!

*****

كان فيه زمان سحلية طولها فرسخين

كهفين عيونها ... وخشمها بربخين

ماتت لكن الرعب لم عمره مات

مع انه فات بدل التارخ تاريخين

وعجبي!!!

*****

عجبتني كلمة من كلام الورق

النور شرق من بين حروفها وبرق

حبيت اشيلها فقلبي قالت حرام

ده انا كل قلب دخلت فيه اتحرق

وعجبي !!!

*****

رقبة قزازة وقلبي فيها انحشر

وشربت كاس واتنين وخامس عشر

صاحبت ناس م الخمرة ترجع وحوش

وصاحبت ناس م الخمرة ترجع بشر

وعجبي !!!

*****

ليه يا حبيبتي ما بينا دايما سفر

ده البعد ذنب كبير لا يغتفر

ليه يا حبيبتي دايما ما بينا بحور

اعدي بحر الاقي غيره اتحفر

وعجبي !!!

*****

ورا كل شباك الف عين مفتوحين

وانا وانتي ماشيين يا غرامي الحزين

لو التصقنا نموت بضربة حجر

ولو افترقنا نموت متحسرين

وعجبي !!!

*****

نوح راح لحاله و الطوفان استمر

مركبنا تايهه لسه مش لاقيه بر

آه م الطوفان وآهين يا بر الأمان

إزاي تبان و الدنيا غرقانه شر

عجبي !!!

*****

علي رجلي دم .. نظرت له ما احتملت

علي إيدي دم.. سألت ليه ؟ لم وصلت

علي كتفي دم.. و حتي علي رأسي دم

أنا كلي دم .. قتلت ؟ ..... والا اتقتلت

عجبي !!!

*****

انا كل يوم أسمع .. فلان عذبوه

أسرح في بغداد و الجزاير واتوه

ما أعجبش م اللي يطيق بجسمه العذاب

و اعجب من اللي يطيق يعذب أخوه

عجبي !!!

*****

ينبوع و في الحواديت أنا سمعت عنه

إنه عجيب .. و ف وسط لهاليب لكنه

شقيت كما الفرسان طريقي .. لقيت

حتي الخنازير و الكلاب شربوا منه

عجبي !!!

*****

يا قرص شمس ما لهش قبة سما

يا ورد من غير أرض شب و نما

يا أي معني جميل سمعنا عليه

الخلق ليه عايشين حياه مؤلمة

عجبي !!!

*****





شاف الطبيب جرحي وصف له الأمل

وعطاني منه مقام يا دوب ما اندمل

مجروح جديد يا طبيب و جرحي لهيب

ودواك فرغ مني .... و إيه العمل

عجبي !!!

*****

أعرف عيون هي الجمال و الحسن

و اعرف عيون تاخد القلوب بالحضن

و عيون مخيفة و قاسية وعيون كتير

وباحس فيهم كلهم بالحزن

عجبي !!!

*****

إيش تطلبي يا نفس فوق كل ده

حظك بيضحك و انتي متنكده

ردت قالت لي النفس : قول للبشر

ما يبصوليش بعيون حزينة كده

وعجبي !!!

*****



إقلع غماك يا تور وارفض تلف

إكسر تروس الساقية و اشتم وتف

قال : بس خطوة كمان .. وخطوة كمان

يا اوصل نهاية السكة يا البير تجف

عجبي !!!

*****

يا حزين يا قمقم تحت بحر الضياع

حزين أنا زيك و إيه مستطاع

الحزن ما بقالهوش جلال يا جدع

الحزن زي البرد ... زي الصداع

عجبي !!!!

*****

في يوم صحيت شاعر براحة و صفا

الهم زال و الحزن راح و اختفي

خدني العجب و سألت روحي سؤال

أنا مت ؟ و لا وصلت للفلسفة

عجبي !!!

*****

الفيلسوف قاعد يفكر سيبوه

لا تعملوه سلطان و لا تصلبوه

ما تعرفوش إن الفلاسفه يا هوه

اللي يقولوه بيرجعوا يكدبوه

عجبي !!!

*****

علي بعد مليون ميل من أرضنا

من الفراغ الكوني بصيت أنا

لا شفت فرق بين جبال و بحور

و لا شفت فرق ما بين عذاب أو هنا

عجبي !!

*****

إنسان أيا إنسان ما أجهلك

ما أتفهك في الكون و ما أضألك

شمس وقمر و سدوم و ملايين نجوم

و فاكرها يا موهوم مخلوقه لك

عجبي !!

*****

نظرت فوق للنجوم و انا ساير

رجليا عترت في الحفر و الحجاير

بقيت أقول و انا ع التراب: يا سلام

مش بس عبره أخذت لكن عباير

عجبي !!!

*****

- يا نجم .. نورك ليه كده بيرتجف ؟

هو انت قنديل زيت ؟ أو تختلف

- أنا نجم عالي .. بس عالي قوي

و كل ما انظر تحت اخاف انحدف

عجبي !!!!

*****

السم لو كان في الدوا منين يضر ؟

و الموت لو عدونا .. منين يسر؟

حط القلم في الحبر و اكتب كمان

.. و العبد للشهوات .. منين هو حر؟

عجبي !!!

*****

وقفت بين شطين علي قنطرة

الكدب فين و الصدق فين يا تري

محتار ح اموت .. الحوت خرج لي وقالي

هو الكلام يتقاس بالمسطرة

عجبي !!!

*****

سرداب في مستشفي الولاده طويل

صرخات عذاب ورا كل باب وعويل

.. وفي الطـريق متزوقين البنات

متزوقـين للحب و المواويل

عجبي !!

*****

الدنيا أوده كـبيره للانتظار

فيها ابن أدم زيه زي الحمار

الهم واحد .. و الملل مشـترك

و مفيش حمار بيحاول الانتحار

عجبي !!

*****

أيوب رماه البين بكل العـلل

سبع سنين مرضان وعنده شلل

الصبر طيب .. صبر أيوب شفاه

بس الأكاده مات بفعل الملل

عجبي !!!

*****

نسمة ربيع لكن بتكوي الوشوش

طيور جميلة بس من غير عشـــوش

قلوب بتخفق إنما وحـــدها

هي الحياه كده .. كلها في الفاشوش

عجبي !!!

*****

يا طير يا عالي في السـما طظ فيك

ما تفتكرشي ربنا مصطـــفيك

برضــك بتاكل دود و للطين تعًًًًودً

تمـص فيه يا حلو .. و يمص فيك

عجبي !!!

*****

كروان جريح مضروب شعاع م القمر

سقط من السموات فؤاده انكســر

جريت عليه قطه علشان تبلعـــه

أتاريه خيال شعراء و مالهــوش أثر

عجبي !!!

*****

ياللي نصحت الناس بشـــرب النبيت

مع بنت حلوه .. وعود , وضحك , وحديت

مش كنت تنصحهم منين يكســـبوا

تمن ده كله ؟ ... و الا يمكن نسـيت

عجبي !!!

*****

ما حد في الدنيا واخد جزاتــه

و لا حـد بيفكر في غير لذاذاته

ما تعرفيش يا حبيبتي .. أنا و انتي مين؟

إنتي عروس النيل ... و أنا النيل بذاته

عجبي !!!

*****

رقاصه خرسا و رقصه من غير نغــم

دنيا . . يا مين يصالحها قبل النـــــدم

ساعتين تهز بوجههـــــا يعنـي

يترجرجوا نهديها يعني نعــــم

عجبي !!!

*****

إخطفني ياللي تحبني ع الحصان

الدنيا قالت يوم في ماضي الزمان

إخطفني ياللي تحبني ع الـــــفرس

الدنيا قالت .. قام خطفها الشيطان

عجبي !!!

*****

من بين شقوق الشيش و شقشقت لك

مع شهقة العصافير و زقزقـت لك

نهار جديد انا . . قوم نشوف نعــمليه

انا قلت يا ح تقتلني .. يا ح اقــتلك

عجبي !!!

انتظرو المزيد لعلامات الفن العربى ...............

تحياتى
عـــــــــــــ الجوارح ــــــــــــازف

بارك الله فيك و المزيد من الاعمال المميزه

ياما صادفت صحاب وماصحبتهمش

وكاسات خمور وشراب ومشربتهش

اندم علي الفرص اللي انا سبتهم

ولا علي الفرص اللي ما سبتهمش

وعجبي !!!

ما اعذب الكلمات
واجمل اللحظات


مشكووووور محمد
انا كنت فعلا بدور علي رباعيات ابوصلاح

خالد كم اسعدنى مرورك مشكور اخى

ويارب دائما بوووود

نوووووووووووووووووور كم اسعدنى مرورك

مشكورة اختى

دمتى بحفظ الرحمن

شـكــ وبارك الله فيك ـــرا لك ... لك مني أجمل تحية .

عبده الجوكر